کشیر تہ ہردچہ کونگہ وارِہ.......
الطاف اندرابی
کشیرٕے مشرقس بیدار کَرِوُزٕ ناووِ وقتس پیٹھ
یہ آلو کأشرین ہندین کنن منز واتناوُن چُھم
مہجور صأبن یہ شعر رود راولپنجہ پاکستانہ پیٹھ شایع سپد وألس معروف ہفت روزہ اخبار.. (کشیر) گوڈنیک صفحس پیٹھ ڈیکہ ٹیککی پاٹھی گوڈہ دوہ پیٹھےٕ سجأوتھ کشیر ہندِ بجرچ شیچھ باوان.. یلہِ زن امیکس آخری صفحس پیٹھ کنہِ عبدالاحد آزاد سند یہ شعر...
ہردٕ وِزے ژٕ دل مہ ہار یہ چھ پیام نوبہار
تازہ گلن چھ انتظار تازہ دِلک بہار کر
مسلسل شایع سپدان رود... ریاستک معروف صحافی تہ دانشور مرحوم خواجہ عبدالصمد وانی آسی امہ اخبارک بانی چیف ایڈیٹر، یم یہ شیچھ خبر تہ یہ آلو کاشرین تا م واتہ مناونہ خاطرہ آخری دمس تام پننی یہ جد جہد جأری تھأو.. تہ ونکینس چھ تہند فرزند ارجمند اطہر مسعود وانی صحافتی محازس پیٹھ پنہ قلمہ بزریعہ یہ مشن جاری تھاوِتھ...ہرد چھ کشیرِ ہندس موسمی بدلاوس پننہ آیہ رنگہ ناوان.. ریتہ کالیک سبزار چھ زرد رنگ منز شروپتھ ززران... داں کھاہ چھ سبزارس سونہ ہاری رنگن منز رنگتھ داں کھلن منز پانس گونہِ راوان تہ مونڈین تہ کنزن پیٹھ پننی رونہ گوڈ وزناوان.. تہ چھیکرس کوچھین تہ گاسہ بنن منز پانس وندہ مستانہ نشہ بچاوان.. پھلدار کولی چھ ژونٹھ، ٹنگ، ڈون بیتہرہ مختلف رنگن مننز رنگہ ناوتھ.... پننین کلین. تراوِتھ کاشتکار تہ کھینہ والین رنزناوان... تہ ہردنی واوٕ رنگشہ چھ پنہ وتھرن لولہِ منز للہ ناوتھ گرایہ مأری ماری الوداع کران.
.ََستمبر اکتوبر تہ نومبرن ریتھ چھ کشیر ہندس ہردس پانہ وانی باگراوان.. اکتوبر سورنس سیتی چھ ریتہ کالیک سبزار تہِ اند واتان... تھدی تھدی بالہ تھونگی چھ شینس خوش آوے ونان... تہ پاتھلین کن ترنیو واوہ گرایو سیتی کاشرین وندٕ سامانن ہند سنز کرنچ شیچھ باوان... یہ چھ ہردُی آسان یلہ کشیر امبرین تہ باقی قسمن ہند میوہ پنہ نہِ خوشبوے سیتی فضا معطر کران، تہ دچھ پونپری تہ ہردٕ رأچھن ہند سوز چھ یندارزنکہ دربارکہ سوزکی پاٹھی کنن منز گریزان ... تہ نیران نیرن کشیر ہندین ویہی علاقن منز کونگہ وارین چاو بران... اکتوبر نہ پتیم پچھ پیٹھ نومبرک گوڈنیک پچھ سورنس تام کونگہ پوشو سیتی مشکاوان ....یہ چھ قدرتن کشیرِ ہنزِ میژے تاثیر بخشمت زِ ہردس منز تہ پن ہرنہ برونہہ بونین پنس ووشلاوِتھ پننہ جوشہ سیت پائیداری تہ استحکامک پژھ گنیراوان..تہ یتھے پاٹھی کونگ وارین منز کونگ پوش بُکہ کھالان تہ یہ شیچھ باوان ز یتھ میژہ منز چھ وندہ زمستانک مقابلہ کرتھ سُلہِ سونتہ ویرہ کیمی تہ ٹیکہ بٹنین جاے دوان تہ بید مشک تہ بادم پھُلیہ سیتی بہارک پیغام دِوان.
کونگہ وارین ہند زکر کرنس سیتی چھ کتکچ زون تہ ژندٕ ہار چ زون ملکہ حبہ خاتون تہ پنن آسن باوان...
ژولہما روشے روشے ولو میانہ پوشے مدنو..
مہجور صأبن چھ پننہ لولک اظہار کران وونمت..
دوہ اکہ ژندٕ ہارِ گریسی گرِ زایس
بخت بناوس پادشاہ باے
تتھ شاہی منز کھوژس خدایس
یاون رایس چھنہ میانی ماے
. ژندہ ہار چ زون یودوے پننہ شاعری منز پوشہ
مدنس ژھانڈان واریاہ. پوشن ہند ذکر کران چھ تاہم یہ چھم نہ پے تمہ چھ کنہ کونگہ پوشن تہ یاد کورمت کورمت ... تہ زانن زانن والی...؛؟
تاہم مہجور صابن چھ کونگ پوشن پورہ پاٹھی ویور تلمت...
کونگہ پوشہ حسنکہ جوشہ ڈألتھ ہوشہ مدن وار
چُھک روشہ بہتھ یاونہ کے جوشہ ژھٹان نار
ہا کونگہ پوشو کونہ وچھان چھکھ ژٕ تسند حال
یمی للہ نووکھ پھولہ نووکھ لوگ نے غم خار
مہجورٕ سُلہِ کوو آکھ زرا ژیری ییزہے یور
دیو ژیے تہِ ییہنے کونگہٕ پوشکی پأٹھی خریدار.... تہ یہ کونگہ پوش روزِ ہرد سورنس تام سونت پھونک پیغام دوان. تہ آزاد صابن یہ شیچھ تہ باوان...
ہردٕ وِزے ژٕ ہمت مہ ہار یہ چھ پیامِ نوبہار.... امااپوز.... مشتاق کشمیری سند یہ ارمان تہ چھ وطنہ نشہ دور وطن دارن للہ ون تہ یہ ویداکھ دیاون..
زن گُمت خاباہ، خیالاہ چُھم پنُن شہرِ جمیل
بیہ ژوداہِم زوُن وچھ ہن زعفران زارن اندر....
واپس کریں
