دل بعض و حسد سے رنجور نہ کر
یہ نور خدا ہے اس سے بے نور نہ کر
اسلام آباد(پی آئی ڈی)یکم اگست 2022۔وزیراعظم آزادحکومت ریاست جموں وکشمیر سردار تنویر الیاس خان نے کہا ہے کہ قائد اعظم کے بعد عمران خان ہی قوم کے لیے بہترین لیڈر ہیں۔ تعلیم اور صحت کے لیے انکے اقدامات ریکارڈ ساز ہیں۔ عمران خان نے اپنے دور میں آزادکشمیر کے فنڈز میں اضافہ کیا اور وہ آزادکشمیر کی تعمیروترقی میں خصوصی دلچسپی رکھتے تھے۔ وفاقی حکومت نے آزادکشمیر کے فنڈز پر کٹ لگایا انہیں یہ سمجھنا چاہیے کہ آزادکشمیر ایک اہم اور حساس علاقہ ہے۔ ہماری یوتھ کی ایک بڑی تعداد بیروزگار ہے اور ہم کلی طور پر فنڈز کے لیے پاکستان پر انحصار کرتے ہیں۔ ہم انکے لیے روزگار کے مواقع پیدا کرنا چاہتے تھے جسکے لیے ہمیں فنڈز درکار تھے۔ انہوں نے کہا کہ وفاقی حکومت نے ہمیں 74 بلین کی ویرایبل گرانٹ کی جگہ 59 بلین فراہم کی۔ پاکستان ہمارا بڑا بھائی اورہم اسکی سرحد وں کے محافظ ہیں۔ وزیراعظم نے کہا کہ آزادکشمیر میں جب مسلم لیگ ن کی حکومت تھی اسوقت کے وزیراعظم عمران خان نے ان کے فنڈز میں اضافہ کیا۔ انہوں نے کہا کہ آزادکشمیر حکومت کو کوئی خطرہ نہیں ہے اسوقت ہمارے پاس 32ممبران ہیں۔ ہماری حکومت نے اب روزگار کی فراہمی اور تعمیر وترقی پر فوکس کر رکھا ہے۔ میری تارکین وطن سے اپیل ہے کہ وہ آئیں اور یہاں سرمایہ کاری کریں انکو حکومت سہولیات دے گی۔