دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد( کشیر رپورٹ۔ پی آئی ڈی)آزاد کشمیر کے ضلع پونچھ کے علاقے درہ شیر خان میں تعینات ہونے والی سینئر معلمہ کو حاضری رپورٹ دینے سے روکنے اور انہیں دھمکانے کے واقعہ کا نوٹس لیتے ہوئے متعلقہ افراد کے خلاف کاروائی شروع کی گئی ہے جس میں محکمہ تعلیم کے ملازمین سمیت مقامی پولیس اہلکاران بھی شامل ہیں۔ واضح رہے کہ سوشل میڈیا پہ ایک وڈیو وائرل ہوئی جس کے مطابق درہ شیر خان کے سکول میں متعین ہونے والی خاتون سینئر معلمہ کوچند مقامی افراد کی طرف سے راستے میں روک لیا گیا تا کہ وہ سکول میں حاضری رپورٹ نہ دے سکیں اور انہیں دھمکایا گیا۔ اس کا مقصد یہ تھا کہ متعلقہ سکول میں عرصہ بیس سال سے متعین ایڈہاک سینئر معلمہ کو ہٹایا نہ جا سکے جس کی جگہ پی ایس سی کا امتحان پاس کر کے نئی سینئر معلمہ کی تقرری عمل میں لائی گئی ۔سینئر معلمہ کا راستہ روکنے والوں نے انہیں دھمکاتے ہوئے کہا کہ یہاں سے کوئی آگے گیا تو نہ ان کی گاڑی بچے گی نہ کوئی بندہ بچے گا۔ وائرل ہونے والی وڈیو میں دیکھا جا سکتا ہے کہ متعین سنیئر معلمہ کو روکنے والے افراد نے کہا انہوں نے سکول کو تالے لگا دیئے ہیں۔