دل بعض و حسد سے رنجور نہ کر
یہ نور خدا ہے اس سے بے نور نہ کر
سرینگر( کشیر رپورٹ) مقبوضہ کشمیرمیں جی 20 ٹورازم اجلاس کے حوالے سے نہایت سخت ترین حفاظتی انتظامات کرتے ہوئے سرینگر کو بھارتی کمانڈوز کے سپرد کیاگیا ہے اور کشمیریوں کی نقل و حرکت پہ پابندیاں لگائی گئی ہیں۔ ہفتے کے روز سی آر پی ایف کمانڈوز، مارکوز اور بلیک کیٹ کمانڈوز کی جانب سے جھیل ڈل اوراس کے ملحقہ علاقوں میں مورک ڈرل کا اہتمام کیا گیا۔ جھیل ڈل اور ایس کے آ ئی سی سی کو سیکورٹی فورسز نے پوری طرح سے اپنی تحویل میں لے رکھا ہے۔سرینگرشہر گزشتہ کئی ہفتوں سے بھارتی فوج کی سخت ترین تحویل میں ہے۔شہر سری نگر میں جی ٹونٹی سربراہی اجلاس کے پیش نظر ہائی الرٹ جاری کیا گیا ہے۔اطلاعات کے مطابق جی ٹونٹی اجلاس کے پیش نظر وادی کشمیر بالخصوص سری نگر کے قرب و جوار میں سیکورٹی کا غیر معمولی بندوبست کیا گیا ہے اوربھاری تعددد میں سیکورٹی اہلکاروں کو تعینات کیا گیا ہے۔ موصولہ اطلاعات کے مطابق شہر کے تمام علاقوں میں سیکورٹی کے سخت انتظامات کئے گئے ہیں اور ناکوں کے جال کو مزید وسیع کردیا گیا ہے۔بھارتی حکام نے میڈیا کو بتایا کہ جنگی سازو سامان سے لیس سیکورٹی اہلکار انتہائی چوکنا ہیں اور ناکوں پر موٹر سائیکلوں کی ضبطی کا سلسلہ بھی جاری ہے۔ناکوں پر مسافر بردار گاڑیوں کی بھی تلاشی لی جارہی ہے اور ان میں سوار مسافروں کی بھی جامہ تلاشی اور ان کے شناختی کارڈ باریک بینی سے چیک کئے جارہے ہیں۔سرینگر میں سخت ترین فضائی نگرانی کے جدید نظام بھی نصب کئے گئے ہیں اور شہرمیں فضائی طورپربھی سخت نظررکھی جا رہی ہے۔ سرینگر میں 22 سے 24 مئی تک منعقد ہونے والی جی 20 اجلاس کے پیش نظر انتظامیہ نے ٹریفک ایڈوائزری جاری کی ہے۔