دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد(پی آئی ڈی)20فروری2022۔آزاد جموں وکشمیر قانون ساز اسمبلی میں آزاد کشمیر کے قومی ترانے میں تبدیلی کے بارے میں قائم کمیٹی کی رپورٹ پر بحث ہوئی۔ پیر کے روز سپیکر چوہدری انوار الحق کی زیر صدارت اجلاس میں سینئر موسٹ وزیر حکومت خواجہ فاروق احمد نے کہاکہ آزادکشمیر کے قومی ترانہ میں ترمیم کے حوالہ سے قائم کردہ کمیٹی کی رپورٹ ایوان میں پیش کی جائیگی جو فیصلہ ایوان کریگا اسی پر عمل ہوگا۔آزادکشمیر کے قومی ترانہ کے حوالہ سے قائم حکومتی کمیٹی کے چیئرمین وزیر زراعت سردارمیراکبرخان نے کہاکہ آزادکشمیر کا قومی ترانہ تبدیل کرنے کا کوئی ارادہ نہیں،پاکستان کا قومی ترانہ سوا منٹ کا جبکہ آزادکشمیر کے قومی ترانے کادورانیہ تین منٹ سے زیادہ ہے، نیت یہ ہے کہ اسکا دورانیہ کم کیا جائے۔ اس سلسلہ میں گزشتہ دور حکومت میں بھی کمیٹی بنائی گئی تھی اور اس نے بھی بڑا کام کیا ہے۔ انہوں نے کہاکہ قطعا ایسا فیصلہ نہیں کریں گے جس پر قومی اتفاق رائے نہ ہو، کوئی ایک فرد یا پارٹی قطعا اکیلے فیصلہ نہیں کرسکتی اور نہ کرنا چاہیے۔ ہماری کوشش ہوگی کہ قومی ترانے کی حیثیت اور وقار میں کوئی فرق نہ آئے۔کمیٹی بنانے میں اگر کہیں کمی بیشی رہ گئی ہے تو اس کو دور کرنے کیلئے تیار ہیں۔ انہوں نے کہاکہ قائد حزب اختلاف یا اپوزیشن اراکین بھی اپنی آرا دینا چاہیں تو ہم تیار ہیں، قائد حزب اختلاف بھی اس کمیٹی کے رکن بننا چاہیں تو ہم حاضر ہیں۔