دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد ۔4 فروری2023 ( کشیر رپورٹ)وزیراعظم آزاد کشمیر سردار تنویر الیاس نے آزاد کشمیر کی خصوصی حیثیت کو پس پشت ڈالتے ہوئے پشاور دھماکے کے شہدا کے 25 افراد کو آزادکشمیر پولیس میں نوکری دینے کا اعلان کیاہے۔آزاد کشمیر میں سٹیٹ سبجیکٹ کا قانون نافذ ہے جس کے تحت ریاست کشمیر سے باہر کا کوئی بھی باشندہ آزاد کشمیر میں سرکاری نوکری حاصل نہیں کر سکتا ،یوں وزیر اعظم آزاد کشمیر سردار تنویر الیاس کا شہدائے پشاور کے لواحقین کے 25افراد کو آزاد کشمیر پولیس میں نوکری دینے کا اعلان سراسر خلاف قانون ہے ۔بھارت نے مقبوضہ جموں وکشمیر کی خصوصی حیثیت کو ختم کرتے ہوئے مقبوضہ جموں وکشمیر میں بھارتی باشندوں کو سرکاری نوکریاں دینے اور وہاں آباد کرنے کے منصوبے پر عملدرآمد شروع کیا ہے،یوں وزیر اعظم تنویر الیاس بھی اسی انداز میں آزاد کشمیر کی خصوصی حیثیت کو ختم کرنے کے درپے نظر آتے ہیں۔وزیر اعظم آزاد کشمیر کا پاکستان کے شہریوں کو آزاد کشمیر میں سرکاری ملازمت دینے کا اقدام غیر قانونی ہونے کے علاوہ آزاد کشمیر کی خصوصی حیثیت کر نے اور کشمیر کاز کو ناقابل تلافی نقصان پہنچانے کے مترادف ہے۔وزیر اعظم آزاد کشمیر نے پشاور بم دھماکے میں شہید ہونے والے افراد کے اہل خانہ کے لیئے ڈھائی لاکھ اور زخمیوں کے لئے فی کس ایک لاکھ دینے کا اعلان کیا ہے۔پشاور دھماکے میں کم از کم ایک سو افراد شہید اور تقریبا225زخمی ہوئے ہیں، یوں وزیر اعظم آزاد کشمیر کے لئے شہید اور زخمی ہونے والوں کے لئے دی جانے والی رقم کی مالیت تقریبا پونے پانچ کروڑ روپے بنتی ہے۔کیا آزاد کشمیر کی ایسی مالی استطاعت ہے کہ وہ پونے پانچ کروڑ کی رقم اس حوالے سے دے سکے؟