دل بعض و حسد سے رنجور نہ کر
یہ نور خدا ہے اس سے بے نور نہ کر
لندن (کشیر رپورٹ)برطانیہ میں کورونا اور انفیکشن کے مریضوں کی بڑی تعداد کی وجہ سے ہسپتالوں پر دبائو میں اضافہ ہو گیا ہے اور مریضوں کو ہسپتال میں داخل ہونے کے لئے تاخیر کی صورتحال کا سامنا ہے۔ تفصیلا ت کے مطابق برطانیہ میں کورونا اور دیگر انفیکشس بیماریوں کے بڑھتے کیسز کے ساتھ ساتھ طبی عملے اور وسائل کی کمی نے حالات کو بحرانی بنا دیا ہے۔ برطانیہ میں مجموعی طور پر 40 فیصد ایمبولینسوں کو نئے سال کے پہلے ہفتے میں اپنے بیمار، ایمرجنسی وارڈ میں داخل کرانے کے لئے کم از کم آدھا گھنٹہ انتظار کرنا پڑا ہے۔ برطانیہ میں یہ صورتحال گزشتہ ایک دہائی کے دوران کبھی نہیں دیکھی گئی۔ برطانیہ سے موصولہ خبروں کے مطابق اس وقت ملک کے بعض ہسپتالوں کو بحرانی صورتحال کا سامنا ہے جسکی وجہ کورونا اور انفلوئنزا جیسی دیگر بیماریوں میں مبتلا ہونے والوں کی بڑھتی تعداد کے علاوہ میڈیکل اسٹاف اور علاج معالجے کے لئے درکار لازمی وسائل کی قلت ہے۔ برطانیہ میں جاری شدہ اعداد و شمار کے مطابق ہر ہفتے پانچ سو بیمار بروقت علاج نہ مل پانے کے سبب اپنی جان سے ہاتھ دھو رہے ہیں۔