نئی دہلی ( کشیر رپورٹ) سکھوں کے قتل عام کی 38ویں برسی کے موقع پرہندوستان کی متعدد سیاسی جماعتوں نے کہا ہے کہ 1984سے بالخصوص ہندوستان میں عوام کے خلاف ریاستی دہشت گردی کو منظم طریقے سے فروغ دیا گیا اور ریاست/حکومت کی طرف سے منظم فرقہ وارانہ تشدد کے واقعات بار بار ہوتے رہے ہیں۔1984میںسکھوں کے قتل عام کے دن کے حوالے سے منعقدہ اجلاس میں کمیونسٹ غدر پارٹی آف انڈیا، جماعت اسلامی ہند، سٹیزن فار ڈیموکریسی، ویلفیئر پارٹی آف انڈیا، سکھ فورم، پروگریسو ویمن آرگنائزیشن، لوک پکشا، جن سنگھرش کوآرڈینیشن کمیٹی، آل انڈیا مسلم مجلس عمل۔ مشاورات، سی پی آئی (ایم ایل) نیو پرولتاریہ، ہند نوجوان ایکتا سبھا، اور مزدور ایکتا کمیٹی کے رہنمائوں نے شرکت کیْ۔
لوک راج سنگٹھن کے صدر ایس راگھون نے کہا کہ گزشتہ 38 سالوں کے دوران ریاستی دہشت گردی کو منظم طریقے سے فروغ دیا گیا ہے اور ریاست کی طرف سے منظم فرقہ وارانہ تشدد کے واقعات بار بار ہوتے رہے ہیں ۔انہوں نے کہاکہ فرقہ وارانہ نسل کشی کرنے والوں اور ہمارے عوام کے اتحاد پر حملہ کرنے والوں کو کوئی سزا نہیں دی جاتی بلکہ ریاست کے اعلی ترین عہدوں پر فائز کیا جاتا ہے۔ دوسری طرف اپنے حقوق کے لیے لڑنے والے لوگوں کو 'دہشت گرد' اور 'ملک دشمن عناصر' کہا جاتا ہے۔ بی جے پی اور کانگریس پارٹی جیسی سیاسی جماعتیں قومی اتحاد کی حفاظت کی بات کرتی ہیں، جب کہ وہ عوام کو تقسیم کرنے، حکمرانوں کے مفادات کی تکمیل کے لیے انتھک محنت کرتی ہیں۔ انہوں نے الزام لگایا کہ وہ باقاعدگی سے اور منظم طریقے سے مذہب، ذات پات، زبان اور علاقے کی بنیاد پر لوگوں کے جذبات بھڑکاتے ہیں، تاکہ مزدوروں اور کسانوں کے اتحاد کو پارہ پارہ کیا جا سکے۔ اس لیے یہ سوچنا غلط ہوگا کہ صرف ایک پارٹی یعنی بی جے پی ہی فرقہ وارانہ تشدد کا ذریعہ ہے کہ حکومت چلانے والی پارٹی کو تبدیل کرنے سے مسئلہ حل ہوجائے گا۔
جماعت اسلامی ہند سے تعلق رکھنے والے انعام الرحمن نے لوک راج سنگٹھن کو ہر سال اس موقع پر جلسہ اور پروگرام منعقد کرنے کے لیے مبارکباد دی۔ انہوں نے کہا کہ اس جرم کو فراموش نہیں کیا جا سکتا اور اس پر ہر سال جلسے کر کے یہ پیغام دیتے ہیں کہ ہم ان جرائم کو برداشت نہیں کرتے۔
دی سکھ فورم کی جانب سے بات کرتے ہوئے لالی سنگھ ساہنی نے کہا کہ سکھ فورم 1984 کے قتل عام کے بعد ہی بنا تھا۔ انہوں نے کہا کہ ہم مجرموں کو معاف بھی کر سکتے ہیں، لیکن ابھی تک یہ ثابت نہیں ہو سکا کہ مجرم کون ہیں۔
ایڈووکیٹ شاہد علی نے کہا کہ ہمارے اسلاف نے قربانیاں اس لیے نہیں دیں کہ ایسی بیوقوف جماعتیں ہم پر حکومت کریں۔ انسانی فطرت انسانیت ہے لیکن 1984 کی نسل کشی کرنے والے انسان نہیں بلکہ شیطان تھے۔ انسان کو ہمیشہ شیطانوں سے لڑنا پڑتا ہے۔ انہوں نے کہا کہ کانگریس پارٹی کو بی جے پی سے بہتر نہیں کہا جا سکتا۔ اگر وہ واقعی بہتر ہوتی تو 1984 کے مجرموں کو سزا دیتی۔
کمیونسٹ غدر پارٹی کی طرف سے برجو نائک نے 1984 کے واقعات پر روشنی ڈالی اور کہا کہ جب کئی لوگوں کے قتل عام کے بارے میں خبردار کرنے کے بعد بھی وزیر داخلہ کارروائی نہیں کرتے ہیں تو اس کا صاف مطلب ہے کہ یہ فساد نہیں تھا بلکہ ان کے ذریعے ایک منظم قتل عام ہوا تھا۔محمد عارف، ویلفیئر پارٹی آف انڈیا نے نشاندہی کی کہ 38 سال قبل سکھوں کی نسل کشی کوئی اچانک فساد نہیں تھا کیونکہ اگر ریاست جاری نہیں رکھنا چاہتی تو ہندوستان میں کوئی بھی فساد چند گھنٹوں سے زیادہ نہیں چل سکتا۔ 1984 کے قتل عام کو حکمراں کانگریس پارٹی اور پوری ریاستی مشینری نے منظم کیا تھا۔
سی پی آئی (M.L.) نئے پرولتاریہ کی جانب سے، شیومنگلا سدھانتکر نے فرقہ وارانہ تشدد کے مسئلے کو ختم کرنے کے لیے مزدوروں کی حکمرانی قائم کرنے کی بات کی۔
پوروگامی مہیلا سنگٹھن کی جانب سے پونم شرما نے کہا کہ ہمیں کہا جاتا ہے کہ ہمیں اتنا پرانا واقعہ بھول جانا چاہیے۔ لیکن جب اس طرح کے قتل بار بار ہوتے ہیں تو ہم اسے کیسے بھول سکتے ہیں۔ انہوں نے مل کر آگے بڑھنے کی جدوجہد پر زور دیا اور کہا کہ ہمیں موجودہ ریاست کو بدل کر ایک نئی ریاست کا قیام عمل میں لانا ہو گا جو تمام شہریوں کو زندگی کا حق، ضمیر کا حق اور دیگر تمام انسانی حقوق اور جمہوری حقوق کی ضمانت دے گی۔
محترمہ سچاریتا نے میٹنگ کا اختتام کرتے ہوئے کہا کہ اس طرح کے گھنائونے جرم کے خلاف جدوجہد اس وقت تک جاری رہے گی جب تک ہم مل کر ایک ایسی ریاست قائم نہیں کرتے جو سب کے حقوق کا تحفظ کرے اور سب کے لیے خوشی اور سلامتی کو یقینی بنائے۔
واپس کریں