دل بعض و حسد سے رنجور نہ کر
یہ نور خدا ہے اس سے بے نور نہ کر
مظفرآباد(پی آئی ڈی)12 اکتوبر2022۔آزادجموں وکشمیر قانون ساز اسمبلی کا اجلاس بدھ کے روز سپیکر اسمبلی چوہدری انوار الحق کی زیر صدارت منعقد ہوا۔ اجلاس میں ممبران اسمبلی کے سوالوں پر وزیر ایلیمنٹری اینڈ سیکنڈری ایجوکیشن دیوان علی خان چغتائی نے ایوان کو بتایا کہ گزشتہ دس سال سے فرائض انجام دینے والے معلمین قرآن کو مستقل کرنے کے لیے 496قراء کی آسامیاں تخلیق کی گئی ہیں تاکہ انسانی ہمدردی کی بنیاد پر دس سال سے خدمات دینے والوں کو مستقل کیا جا سکے۔ انہوں نے کہا کہ12سال سے کم سروس والے ایڈہاک ملازمین کی فراغت کے حوالہ سے سوشل میڈیا پر چلنے والی خبر میں صداقت نہیں۔ ایڈہا ک کمیٹی کی جانب سے ایڈہاک ملازمین کے کوائف مانگے گئے ہیں اور اس حوالہ سے 21اکتوبر کو اجلاس ہو گا۔ انہوں نے کہا کہ مستقبل میں ساڑھے 4ہزار ناظرہ قرآن ٹیچرزکی آسامیاں تخلیق کر رہے ہیں۔ 496قراء کی مستقلی کے بعد ان کے سکیل کو اپ گریڈ کریں گے۔ وزیر صحت نثار انصر ابدالی نے سردار جاوید ایوب کے سوال پر ایوان کو بتایا کہ کیتھ لیب کارڈیک ہسپتال میں کام چلانے کے لیے موجودہ ایم ایس کوتعینات کیا گیا ہے۔ اس حوالہ سے ٹریننگ کے لیے میڈیکل آفیسران اور سٹاف کو بھیجا گیا ہے۔ جس کے بعد متعلقہ شعبہ سے ہی تعیناتیاں کی جائیں گی۔وزیرخزانہ عبدالماجد خان نے سردار جاوید ایواب کے سوال پر اایوان کو بتایا کہ دبئی ایکسپو 2020میں حکومت آزادکشمیر کی ہدایت کے مطابق آزادکشمیر سے وفد نے نمائندگی کی۔ اس حوالہ سے وفاقی حکومت کی بھی ہدایات تھیں۔ دبئی ایکسپو میں کشمیر کی ثقافت اور ورثہ کو اجاگر کیا گیا۔ وزیر صنعت چوہدری مقبول گجر نے کہا کہ دبئی ایکسپو میں 41 ایم او یو سائن کیے گئے جن کی تفصیل ایوان میں پیش کریں گے۔