اویس شاہ کو بازیاب کروا لیا گیا، کاروائی میں تین اغوا کار ہلاک
پاکستانی فوج کے محکمۂ اطلاعات آئی ایس پی آر کے مطابق چیف جسٹس سندھ ہائی کورٹ سجاد علی شاہ کے بیٹے اویس شاہ کو بازیاب کروا لیا گیا ہے۔ آئی ایس پی آر کے سربراہ میجر جنرل عاصم باجوہ نے ٹوئٹر پر ایک پیغام میں کہا کہ اویس شاہ کو سکیورٹی اداروں کی ایک کارروائی کے دوران خیبرپختونخوا کے ضلع ٹانک سے اغوا کاروں کے قبضے سے چھڑایا گیا۔ ان کا کہنا ہے کہ اس کارروائی میں تین اغوا کار مارے گئے۔ سرکاری ذرائع ابلاغ کے مطابق اویس شاہ کو کراچی میں ان کے گھر پہنچا دیا گیا ہے۔ اویس شاہ ایڈووکیٹ گذشتہ ماہ کراچی کے متمول علاقے کلفٹن میں واقع ایک سپر سٹور کے باہر سے غائب ہوگئے تھے۔
جنرل باجوہ نے مزید کہا کہ چیف آف آرمی سٹاف جنرل راحیل شریف نے اویس شاہ کے والد کو فون کر کے انھیں ان کے بیٹے کی بازیابی کی مبارکباد دی۔
جنرل باجوہ کی ٹویٹ کے مطابق آرمی چیف نے انٹیلیجنس اور سکیورٹی اداروں کی کامیاب کارروائی کو بھی سراہا ہے۔
وزیراعظم محمد نواز شریف نے اویس شاہ کی بازیابی پر چیف جسٹس سندھ ہائی کورٹ کو مبارک باد دی ہے اور اویس شاہ کی بازبابی پر سکیورٹی فورسز کے کردار کو قابل تحسین قرار دیا ہے۔
واپس کریں
