دل بعض و حسد سے رنجور نہ کر
یہ نور خدا ہے اس سے بے نور نہ کر
اسلام آباد(پی آئی ڈی) 18 اپریل 2024۔آزادجموں و کشمیر کے وزیراعظم چوہدری انوارالحق اور وفاقی وزیر امور کشمیر ،گلگت بلتستان و سیفران انجینئر امیر مقام کے درمیان جموں کشمیر ہائوس اسلام آباد میں ملاقات ہوئی ۔ملاقات کے دوران مقبوضہ کشمیر کی موجودہ صورتحال ،آزادکشمیر میں ترقیاتی منصوبوں سمیت باہمی دلچسپی کے جملہ امور پر تبادلہ خیال کیا گیا ۔وفاقی وزیر امور کشمیر ،گکگت بلتستان و سیفران انجینئر امیر مقام نے تحریک آزادی کشمیر کیلئے پاکستان کی سیاسی ،اخلاقی و سفارتی حمایت کا اعادہ کیا ۔انہوں نے کہا کہ پاکستان اور کشمیر لازم و ملزوم ہیں ۔کشمیری عوام اپنے جائز حق خودارادیت کیلیے جو جدوجہد کر رہے ہیں وہ انشااللہ اس میں کامیاب ہونگے ۔انہوں نے مقبوضہ کشمیر میں نہتے شہریوں پر بھارتی فوج کے مظالم کی مذمت کی ۔انہوں نے وزیراعظم کو آزادکشمیر میں ترقیاتی منصوبوں کے سلسلے میں اپنے مکمل تعاون کا یقین دلایا ۔انہوں نے کہا کہ وزیراعظم پاکستان محمد شہباز شریف آزادکشمیر کی تعمیر وترقی میں گہری دلچسپی رکھتے ہیں ،آزادکشمیر حکومت کے ساتھ وفاقی حکومت کا تعاون جاری رہے گا ۔